पायाला फ्रॅक्चर, पण शेतकऱ्यांच्या कल्याणासाठी व्हीलचेअरवरून मंत्रालयाची वारी; आमदार अर्जुनराव खोतकरांच्या पाठपुराव्याला यश!

 

 या शेतकऱ्यांच्या कर्जप्रकरणाचा 'छत्रपती शिवाजी महाराज शेतकरी सन्मान कर्जमाफी योजने'त समावेश करून त्यांना कर्जमाफीचा लाभ मिळवून देण्यासाठी आमदार अर्जुनराव खोतकर यांनी सातत्याने पाठपुरावा केला होता. अनेक वर्षांपासून प्रलंबित असलेला हा प्रश्न सोडवण्यासाठी त्यांनी शेतकऱ्यांची बिकट आर्थिक परिस्थिती, तारणात अडकलेल्या जमिनी आणि नव्या कर्जासाठी येणाऱ्या अडचणी शासन व बँकेच्या वरिष्ठ अधिकाऱ्यांसमोर अत्यंत प्रभावीपणे मांडल्या.

या बैठकीतील खोतकरांच्या उपस्थितीने त्यांच्या सर्वसामान्यांबद्दलच्या आणि शेतकऱ्यांप्रती असलेल्या दृढ संवेदनशीलतेची साक्ष दिली. अलीकडेच झालेल्या अपघातात त्यांच्या पायाला फ्रॅक्चर झाल्याने डॉक्टरांनी त्यांना एक ते दीड महिना सक्तीच्या विश्रांतीचा सल्ला दिला होता. असे असतानाही, स्वतःच्या शारीरिक वेदना बाजूला सारून अवघ्या आठ दिवसांत ते थेट व्हीलचेअरवरून मंत्रालयात पोहोचले. आपल्या वैयक्तिक प्रकृतीच्या अडचणींपेक्षा त्यांनी दीड हजार शेतकरी कुटुंबांच्या उज्ज्वल भविष्याला आणि त्यांच्या हक्काला सर्वोच्च प्राधान्य दिले.

रामनगर परिसरातील या शेतकऱ्यांच्या जमिनी कर्जासाठी तारण असल्यामुळे त्यांना इतर बँकांकडून कर्ज मिळण्यात मोठे अडथळे निर्माण होत होते. शेतीसाठी आवश्यक भांडवलाचा मार्ग अडल्याने अनेक कुटुंबे वर्षानुवर्षे हलाखीत जीवन जगत होती. कर्ज फेडीची चिंता आणि आगामी हंगामासाठी पैसा उभा करण्याची धडपड, अशा दुहेरी कात्रीत सापडून शेतकरी हतबल झाले होते. ही भीषण परिस्थिती जवळून अनुभवत आमदार खोतकरांनी संबंधित यंत्रणांना एकाच व्यासपीठावर आणून हा प्रश्न मार्गी लावला.