जालना जिल्ह्यातील दुष्काळाला उद्योजक, स्वयंसेवी संस्थांचा आधार जिल्हाधिकारी आशिमा मित्तल यांचे गाव दत्तक अभियान

 

 

यावेळी मित्तल म्हणाल्या की, लोकसहभागाच्या माध्यमातून सामाजिक दायित्वाची भावना कृतीत उतरवून समाजहिताचा नवा आदर्श निर्माण करणे, हा या उपक्रमाचा मुख्य उद्देश आहे. जिल्ह्यातील दुष्काळग्रस्त आणि अतिसंवेदनशील गावांमधील नागरिकांना मदत मिळवून देण्यासाठी तसेच मदत करू इच्छिणाऱ्या व्यक्ती, उद्योजक, स्वयंसेवी संस्था आणि सामाजिक संस्थांना गरजूंशी थेट जोडण्यासाठी त्रिस्तरीय सूत्रावर आधारित हे अभियान राबविण्यात येणार आहे. या अभियानात जिल्हा प्रशासन मुख्य सुविधादाता म्हणून काम करणार असून, हेल्पलाइन, संस्थांचा सहभाग आणि नागरिकांचे योगदान या तीन प्रमुख स्तंभांवर अभियानाची अंमलबजावणी केली जाणार आहे.

अभियानाच्या पहिल्या टप्प्यात जिल्ह्यातील सर्व आठ ही तालुक्यांसाठी स्वतंत्र हेल्पलाइन क्रमांक जाहीर करण्यात आले आहेत. या हेल्पलाइनच्या माध्यमातून मदतीची गरज असलेल्या नागरिकांची तसेच मदत करण्यास इच्छुक व्यक्ती व संस्थांची नोंदणी केली जाणार आहे. पाणी, जनावरांसाठी चारा, रोजगार, शैक्षणिक मदत, आरोग्यसेवा आणि कर्ज यांसारख्या गरजांसाठी नागरिकांना मदत मागता येईल. त्याचबरोबर आर्थिक मदत, आवश्यक साहित्य किंवा कुटुंब व गाव दत्तक घेण्याची इच्छा असलेल्यांनाही या यंत्रणेद्वारे सहभागी होता येणार आहे. यामुळे गरजूंना योग्य मदतदारांशी जोडण्याची प्रक्रिया सुलभ होणार असल्याचे श्रीमती मित्तल यांनी सांगितले.