जालन्यात डॉक्टरांच्या सुरक्षेचा प्रश्न ऐरणीवर?डॉक्टरांना धमकावणे, खंडणी व बदनामीच्या तक्रारींवर IMA आक्रमक

 

 

जालना- जालना शहरातील खासगी रुग्णालये, वैद्यकीय व्यावसायिक आणि आरोग्य कर्मचाऱ्यांना कथितरीत्या धमकावणे, खंडणीसाठी दबाव आणणे, उपचाराच्या बिलावरून वाद निर्माण करणे तसेच सोशल मीडिया आणि विविध माध्यमांवर डॉक्टरांची बदनामी करण्याचे प्रकार वाढत असल्याचा दावा इंडियन मेडिकल असोसिएशन (IMA), जालना शाखेने केला आहे. या पार्श्वभूमीवर IMAच्या पदाधिकाऱ्यांनी जिल्हा पोलीस अधीक्षकांना निवेदन देत संबंधित प्रकरणांमध्ये कठोर कायदेशीर कारवाई करण्याची मागणी केली आहे. दरम्यान, पोलिस अधीक्षक तेगबिर सिंह यांनी डॉक्टरांच्या शिष्टमंडळाला आश्वस्त करून सर्व ती मदत व संरक्षण देण्याचे आश्वासन यावेळी दिल्याचे आयएमएचे अध्यक्ष डॉ.बळीराम बागल यांनी सांगितले.

खंडणी व ब्लॅकमेलिंगचे प्रकार वाढल्याचा दावा

IMAने निवेदनात ‘Extortion & Blackmail’ संदर्भात चिंता व्यक्त केली आहे. रुग्णालये किंवा डॉक्टरांना लक्ष्य करून धमकावणे, आर्थिक तडजोडीसाठी मानसिक दबाव निर्माण करणे आणि ब्लॅकमेल करण्याचे प्रकार गंभीर असल्याचे संघटनेने म्हटले आहे. उपचार पूर्ण झाल्यानंतर पूर्वनिश्चित पद्धतीने रुग्णालयाचे देयक न भरता त्यासाठी प्रशासनावर दबाव आणणे तसेच दमदाटी करून बिलाची माफी मागण्याचे प्रकार सातत्याने घडत असल्याचा दावा निवेदनात करण्यात आला आहे.

रुग्ण किंवा त्यांच्या नातेवाईकांखेरीज काही असंबंधित व्यक्ती किंवा कथित कार्यकर्ते रुग्णालयांमध्ये हस्तक्षेप करून चौकशी किंवा तक्रारी करण्याचा प्रयत्न करतात, असा आरोप IMAने केला आहे. वैद्यकीय ज्ञानाचा अभाव असतानाही केवळ दबाव निर्माण करण्यासाठी खोट्या किंवा बिनबुडाच्या तक्रारी दाखल केल्या जात असल्याचे निवेदनात नमूद आहे.

वैद्यकीय किंवा प्रशासकीय चौकशी होण्यापूर्वीच काही व्यक्तींकडून सोशल मीडिया आणि विविध प्रसारमाध्यमांवर डॉक्टरांविरोधात बदनामीकारक मजकूर प्रसिद्ध केला जात असल्याचा आरोप IMAने केला आहे. त्यामुळे डॉक्टरांची सामाजिक प्रतिष्ठा आणि प्रतिमा धोक्यात येत असल्याचे संघटनेने म्हटले आहे.