रात्रीच्या अंधारात शेतात सापडले गुप्तधनाचे गूढ; परतूर पोलिसांची धडाकेबाज कारवाई.

 

परतूर (प्रतिनिधी):लोभाचे भूत मानगुटीवर बसले की माणूस कसा विवेक गमावतो, याचेच एक उदाहरण परतूर तालुक्यात उघडकीस आले आहे. गुप्तधन मिळविण्याच्या हव्यासापोटी टाकळखोरा-माहोरा परिसरातील एका शेतात मध्यरात्री मांत्रिकामार्फत सुरू असलेला अघोरी विधी परतूर पोलिसांनी छापा टाकून उधळून लावला आहे. या कारवाईमुळे अंधश्रद्धेच्या आहारी जाणाऱ्यांमध्ये चांगलीच खळबळ उडाली आहे.बुधवार, ११ नोव्हेंबर रोजी रात्री साधारण १२:५० वाजण्याच्या सुमारास परतूर पोलीस ठाण्याच्या हद्दीतील टाकळखोरा-माहोरा परिसरातील एका शेतात काही संशयास्पद हालचाली सुरू असल्याची खात्रीशीर माहिती पोलिसांना मिळाली. या माहितीची गंभीर दखल घेत पोलिसांनी क्षणाचाही विलंब न लावता तातडीने घटनास्थळी धाव घेतली.पोलिसांनी घटनास्थळी जाऊन पाहणी केली असता, काही व्यक्ती अंधारात अत्यंत संशयास्पदरीत्या विविध प्रकारच्या पूजा व अघोरी विधी करताना आढळल्या. पोलिसांनी तात्काळ सर्व संबंधितांना ताब्यात घेऊन चौकशी केली असता, गुप्तधन मिळविण्याच्या उद्देशाने हा सर्व खटाटोप सुरू असल्याचे स्पष्ट झाले.