मोबाईल गायब असल्याने गूढ वाढले! अवघडराव सावंगी येथे गळफास घेतलेल्या अवस्थेत आढळला मृतदेह; फॉरेन्सिक पथकाकडून घटनास्थळाची पाहणी, हजारो भाविकांच्या उपस्थितीत शोकाकुल वातावरणात अंत्यसंस्कार
विशाल अस्वार | वालसावंगी
वालसावंगी : भोकरदन तालुक्यातील अवघडराव सावंगी येथे एका कीर्तनकार महाराजांचा संशयास्पद परिस्थितीत मृतदेह आढळून आल्याने संपूर्ण परिसरात खळबळ उडाली आहे. शनिवारी रात्री गावात कीर्तनाचा कार्यक्रम आटोपून मठात परतलेल्या महाराजांचा मृतदेह रविवारी सकाळी राहत्या खोलीत गळफास घेतलेल्या अवस्थेत आढळून आला. विशेष म्हणजे, घटनास्थळावर त्यांचा मोबाईल फोन आढळून न आल्याने या घटनेभोवतीचे गूढ अधिकच वाढले आहे. पोलिसांनी घटनास्थळी धाव घेत तपास सुरू केला असून, मृत्यूमागील नेमके कारण काय, याकडे सर्वांचे लक्ष लागले आहे.
मृत कीर्तनकार महाराजांचे नाव ह.भ.प. दौलत रामनाथ सातपुते (वय ४१, मूळ रा. मुसळगाव, ता. सिन्नर, जि. नाशिक) असे आहे. ते मागील आठ ते दहा वर्षांपासून भोकरदन तालुक्यातील अवघडराव सावंगी येथील पाताळेश्वर मंदिर परिसरातील मठात वास्तव्यास होते. कीर्तन आणि समाजप्रबोधनाच्या माध्यमातून त्यांनी परिसरात आपली वेगळी ओळख निर्माण केली होती.
रात्री कीर्तन, सकाळी दुर्दैवी घटना उघड
ह.भ.प. दौलत सातपुते महाराज हे गावोगावी कीर्तनाच्या माध्यमातून धार्मिक विचारांसोबतच सामाजिक प्रबोधनाचे कार्य करीत होते. तरुणांनी व्यसनांपासून दूर राहावे, आई-वडिलांची सेवा करावी तसेच राष्ट्रसेवेला प्राधान्य द्यावे, असा संदेश ते आपल्या कीर्तनातून देत असत.
शनिवारी रात्री अवघडराव सावंगी येथे त्यांचा कीर्तनाचा कार्यक्रम आयोजित करण्यात आला होता. रात्री सुमारे दहा वाजेपर्यंत कीर्तन केल्यानंतर ते नेहमीप्रमाणे पाताळेश्वर मंदिर परिसरातील आपल्या मठात परतले. त्यानंतर ते खोलीत झोपण्यासाठी गेले. मात्र, रविवारी सकाळी बराच वेळ होऊनही महाराज खोलीबाहेर आले नाहीत. मंदिरात दर्शनासाठी येणाऱ्या भाविकांना ही बाब लक्षात आल्यानंतर त्यांनी महाराजांचा शोध घेण्यास सुरुवात केली. परिसरात शोधाशोध करूनही ते आढळून न आल्याने त्यांच्या राहत्या खोलीत पाहणी करण्यात आली. त्यावेळी भगव्या रंगाच्या रुमालाच्या साहाय्याने गळफास घेतलेल्या अवस्थेत त्यांचा मृतदेह आढळून आला. सकाळी सुमारे दहा वाजण्याच्या सुमारास ही घटना उघडकीस आली.
मोबाईल फोन गायब; तपासाला महत्त्वाचे वळण?
या घटनेतील सर्वाधिक चर्चेचा मुद्दा म्हणजे महाराजांचा मोबाईल फोन घटनास्थळी आढळून न येणे. रात्री कीर्तनाचा कार्यक्रम संपवून मठात परतलेल्या महाराजांचा दुसऱ्या दिवशी सकाळी मृतदेह आढळणे आणि त्यांचा मोबाईल गायब असणे, यामुळे अनेक प्रश्न उपस्थित होत आहेत.
मोबाईल फोन नेमका कुठे गेला? तो हरवला की अन्य कोणत्या कारणामुळे घटनास्थळी आढळला नाही? मृत्यूपूर्वी महाराजांचा कोणाशी संपर्क झाला होता का? अशा विविध शक्यतांच्या अनुषंगाने तपास होण्याची गरज व्यक्त केली जात आहे. मात्र, या घटनेत घातपात झाला आहे किंवा अन्य काही कारण आहे, याबाबत अद्याप कोणताही निष्कर्ष समोर आलेला नाही.
फॉरेन्सिक पथकाकडून घटनास्थळाची पाहणी
घटनेची माहिती मिळताच पारध पोलीस ठाण्याचे सहायक पोलीस निरीक्षक सचिन खामगळ यांनी पोलीस पथकासह घटनास्थळी धाव घेतली. घटनेचे गांभीर्य लक्षात घेऊन विधिविज्ञान प्रयोगशाळेच्या (फॉरेन्सिक) पथकालाही पाचारण करण्यात आले. पथकाने घटनास्थळाची बारकाईने पाहणी करून आवश्यक पुरावे गोळा केले. महाराजांचा मोबाईल फोन गायब असण्यासह घटनास्थळावरील परिस्थिती, उपलब्ध पुरावे आणि इतर संबंधित बाबींच्या आधारे पोलीस तपास करीत आहेत. शवविच्छेदन अहवाल तसेच पोलीस तपासातूनच मृत्यूचे नेमके कारण स्पष्ट होणार आहे.
हजारो भाविकांच्या उपस्थितीत अंत्यसंस्कार
या घटनेनंतर महाराजांचा मृतदेह शवविच्छेदनासाठी वालसावंगी येथील प्राथमिक आरोग्य केंद्रात पाठविण्यात आला. शवविच्छेदनाची प्रक्रिया पूर्ण झाल्यानंतर त्यांचे पार्थिव अवघडराव सावंगी येथे आणण्यात आले. यावेळी हजारो भाविकांनी अंत्यदर्शनासाठी गर्दी केली होती. अत्यंत शोकाकुल वातावरणात त्यांच्या पार्थिवावर अंत्यसंस्कार करण्यात आले.
कीर्तनाच्या माध्यमातून समाजाला चांगल्या विचारांची शिकवण देणाऱ्या महाराजांच्या अचानक झालेल्या मृत्यूने भाविकांना मोठा धक्का बसला आहे. त्यांच्या निधनाने परिसरात हळहळ व्यक्त होत असून, या घटनेमागील सत्य समोर यावे, अशी अपेक्षा नागरिक आणि भाविकांकडून व्यक्त केली जात आहे.
दरम्यान, महाराजांच्या मृत्यूचे नेमके कारण काय आणि त्यांचा मोबाईल फोन कुठे गेला, या प्रश्नांची उत्तरे पोलीस तपासातून समोर येणार आहेत. त्यामुळे या प्रकरणाच्या पुढील तपासाकडे संपूर्ण परिसराचे लक्ष लागले आहे.