डिसेंबरनंतर जालन्यातील जनतेला आठवड्यातून एकदा पाणी पुरवठा करणार - मा.आ.कैलास गोरंटयाल

 

 

जालना शहरातील जनतेला पाणी पुरवठा करणाऱ्या जायकवाडी - जालना पाणी पुरवठा योजनेच्या टप्पा -२ अंतर्गत अंबड येथील जलशुद्धीकरण केंद्रात कामाला आज गुरुवारी माजी आमदार कैलास गोरंटयाल यांच्यासह भाजपाचे जालना शहर महानगर जिल्हाध्यक्ष भास्कर दानवे,महापौर वंदना मगरे, उपमहापौर राजेश राऊत, अंबडचे नगराध्यक्ष केदार कुलकर्णी, पाणी पुरवठा सभापती सौ.पूनम स्वामी, नगरसेवक सिद्धिविनायक मुळे,राज स्वामी, जालना मनपाच्या पाणी पुरवठा विभागाचे उपअभियंता तायडे,शहर अभियंता राजेश बगळे आदींनी भेट देऊन पाहणी केली. या पाहणीनंतर जलशुद्धीकरण केंद्रात उपस्थीत पत्रकारांशी संवाद साधतांना गोरंटयाल म्हणाले की, जालना शहरातील पाणी प्रश्न कायमस्वरूपी मार्गी लावण्यासाठी आपण आमदार असतांना जायकवाडी - जालना ही ६० एमएलडीची महत्त्वाकांक्षी योजना मंजूर करून घेतली.मात्र या योजनेचे डीपीआर तयार करतांना चुकून २४ एमएलडी झाले. त्यामुळे २० एमएलडी पेक्षा अधिक पाण्याचे शुद्धीकरण करण्यासाठी अडचणी आल्या.या २० एमएलडी पैकी ४ एमएलडी पाणी अंबड नगर पालिका घेते तर योजने दरम्यान असलेल्या डावरगावात मोठया प्रमाणावर पाणी चोरी होते. त्यामुळे जालन्याला दररोज केवळ १२ ते १३ एमएलडी इतकेच पाणी उपलब्ध होते.या पाण्याचा वापर जुना जालना भागातील जनतेसाठी तर घानेवाडी येथील राष्ट्रसंत गाडगे बाबा जलाशयातून नवीन जालन्याला पाणी पुरवठा करण्यात येतो. परंतु यंदा पावसाने दगा दिल्यामुळे गाडगे बाबा जलाशयातील पाणी साठा कमी झाला असून दुष्काळ असल्यामुळे आगामी काळात पाण्याची होणारी टंचाई लक्षात घेऊन जालना मनपा प्रशासनाने आवश्यक ते नियोजन व उपाययोजना राबवण्याकडे लक्ष केंद्रित केल्याचे गोरंटयाल यांनी सांगितले. भाजपचे ज्येष्ठ नेते माजी केंद्रीय राज्यमंत्री रावसाहेब पाटील दानवे, माजी मंत्री आ.बबनराव लोणीकर,भाजपा जिल्हाध्यक्ष तथा आमदार नारायणराव कुचे,आ.संतोष पाटील दानवे आणि आपण राज्याचे मुख्यमंत्री देवेंद्र फडणवीस यांच्याकडे केलेल्या पाठपुराव्यानंतर अंबड येथील जलशुद्धीकरण केंद्रातील पाणी शुद्धीकरण टप्पा - २ योजना आणि घानेवाडी ते जालना येथील जलशुद्धीकरण ही नवीन जलवाहिनी करण्याच्या कामाला मंजुरी देत राज्य सरकारने त्यासाठी तब्बल ७६ कोटी रुपयांचा निधी मंजूर केल्याचे सांगून गोरंटयाल म्हणाले की, त्यापैकी ५० कोटी रुपयांचा निधी प्राप्त झाला असून आतापर्यंत ४६ कोटी रुपये कामावर खर्च झाले आहे.६ कोटी रुपयांचा निधी लवकरच प्राप्त होणार असून २७ कोटी रुपये दीर्घकालीन कर्ज स्वरूपात घेण्यात येणार आहे.टप्पा -२ योजनेचे काम अंतिम टप्प्यात आले असून जालना शहराला दररोज ४० एमएलडी पाणी पुरवठा करण्याची तयारी मनपाची आहे. खरं तर टप्पा - २ या योजनेचे काम पूर्ण झाल्यानंतर शहरातील जनतेला दररोज पाणी पुरवठा करण्याचे आपले स्वप्न होते.परंतु यंदा पाऊस कमी झाल्यामुळे दुष्काळ पडला असल्याने दररोज पाणी पुरवठा करणे शक्य नाही. आगामी काळात पाण्याची भीषण टंचाई निर्माण होण्याची शक्यता लक्षात घेऊन जालना मनपातर्फे आवश्यक ते नियोजन करण्यात येत दुष्काळी परिस्थितीत देखील शहरातील जनतेला आठवड्यातून एक दिवस पाणी पुरवठा करण्याचा प्रयत्न केला जाणार आहे.

 

 

 

वर्ल्ड बँकेकडून मिळणार बाराशे कोटींचा निधी