जालना : अवैध शस्त्र बाळगणारे दोघे जेरबंद

 

जालना जिल्ह्यात अवैध शस्त्र बाळगणाऱ्या इसमांचा शोध घेऊन कारवाई करण्याच्या सूचना पोलीस अधीक्षक तेजस्वी सिंग संधू यांनी स्थानिक गुन्हे शाखेचे पोलीस निरीक्षक पंकज जाधव व त्यांच्या पथकाला दिल्या होत्या. त्यानुसार स्थानिक गुन्हे शाखेच्या पथकाने शहरात शोधमोहीम सुरू केली होती.

दरम्यान, पोलिसांना मिळालेल्या माहितीनुसार रोहित दिनेश राजपूत (वय १९, रा. ओम शांती गल्ली, संभाजी नगर, जालना) याच्याकडे अवैध शस्त्र असल्याची माहिती मिळाली. पोलिसांनी त्याचा शोध घेतला असता तो संभाजी नगर परिसरातील राहत्या घरी मिळून आला. त्याच्याकडून १ हजार ५०० रुपये किमतीची एक तलवार जप्त करण्यात आली.पोलिसांनी अधिक चौकशी केली असता रोहितचा मित्र आदित्य सुरेश साळुंके (वय २०, रा. तीन मंदिर गल्ली, संभाजी नगर, जालना) याच्याकडेही तलवार असल्याची माहिती मिळाली. त्याचा शोध घेतला असता तो स्वामी समर्थ वेल्डिंग दुकान, सागर गल्ली, भोकरदन नाका परिसरात मिळून आला. त्याच्याकडून १ हजार रुपये किमतीची एक तलवार जप्त करण्यात आली.