जालना जिल्ह्यात दुष्काळ जाहीर; आमदार अर्जुनराव खोतकर यांच्या पाठपुराव्याला यश

 

जालना : राज्यातील अनेक भागांत निर्माण झालेल्या दुष्काळसदृश परिस्थितीच्या पार्श्वभूमीवर राज्य सरकारने राज्यातील २६५ तालुक्यांमध्ये दुष्काळ जाहीर केला आहे. या निर्णयात जालना विधानसभा मतदारसंघासह जालना जिल्ह्याचा समावेश झाल्याने जिल्ह्यातील शेतकऱ्यांना मोठा दिलासा मिळाला आहे.

यंदाच्या खरीप हंगामात पावसाने मोठा खंड दिल्याने जालना जिल्ह्यातील शेतीपिकांवर त्याचा गंभीर परिणाम झाला. सोयाबीन, कापूस, मूग, उडीद यांसह विविध खरीप पिकांचे उत्पादन बाधित झाले आहे. पावसाच्या अनिश्चिततेमुळे शेतकऱ्यांसमोर आर्थिक संकट निर्माण झाले असून, दुष्काळ जाहीर करण्याची मागणी विविध स्तरांतून करण्यात येत होती.

या पार्श्वभूमीवर आमदार अर्जुनराव खोतकर यांनी शेतकऱ्यांच्या प्रश्नांसाठी शासनस्तरावर सातत्याने पाठपुरावा केल्याची माहिती त्यांच्या समर्थकांकडून देण्यात आली आहे. जालना जिल्ह्यातील दुष्काळी परिस्थिती लक्षात घेऊन शेतकऱ्यांना तातडीने मदत मिळावी, पिकांचे पंचनामे करण्यात यावेत तसेच पाणी, चारा आणि इतर आवश्यक उपाययोजना राबवाव्यात, यासाठी त्यांनी शासनाचे लक्ष वेधले होते.जिल्ह्यातील दुष्काळी परिस्थितीची तीव्रता यापूर्वीही समोर आली होती. पिकांची स्थिती चिंताजनक झाल्याने पिकांचे पंचनामे, पाणीटंचाई निवारण तसेच जनावरांसाठी चारा-पाण्याची व्यवस्था करण्याची मागणी करण्यात आली होती.

दुष्काळ जाहीर झाल्यानंतर आमदार अर्जुनराव खोतकर यांनी शेतकऱ्यांच्या हिताचा निर्णय घेतल्याबद्दल मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्राताई पवार यांचे आभार व्यक्त केले. तसेच महाराष्ट्राचे कृषिमंत्री दत्तात्रय भरणे यांचेही जालना जिल्ह्याच्या वतीने आभार मानले.

आमदार अर्जुनराव खोतकर यांच्या निवेदनानुसार, बळीराजावर संकट आले असताना शेतकऱ्यांच्या हिताचा निर्णय घेत दुष्काळ जाहीर केल्याबद्दल मुख्यमंत्री मा. श्री. देवेंद्रजी फडणवीस, उपमुख्यमंत्री मा. श्री. एकनाथजी शिंदे व उपमुख्यमंत्री मा. सुनेत्राताई पवार यांचे मनःपूर्वक आभार. या निर्णयामुळे दुष्काळग्रस्त शेतकरी बांधवांना मोठा दिलासा मिळणार आहे. शेतकरी हितासाठी घेतलेल्या या महत्त्वपूर्ण निर्णयाचे मनापासून स्वागत. आता जालना जिल्ह्यात दुष्काळी उपाययोजनांची प्रभावी अंमलबजावणी, पिकांच्या नुकसानीचे पंचनामे, पाणीटंचाई निवारण, जनावरांसाठी चारा-पाण्याची उपलब्धता आणि शासनाच्या मदतीचा प्रत्यक्ष लाभ शेतकऱ्यांपर्यंत पोहोचणे महत्त्वाचे ठरणार आहे. दुष्काळाच्या पार्श्वभूमीवर शासनाकडून जाहीर होणाऱ्या मदतीकडे जालना जिल्ह्यातील शेतकऱ्यांचे लक्ष लागले असून, प्रशासनाने दुष्काळी उपाययोजना तातडीने राबवाव्यात, अशी अपेक्षा व्यक्त होत आहे.